రాష్ట్రంలో కొత్తగా 12 డయాలసిస్ కేంద్రాలు ఏర్పాటు-వైద్య ఆరోగ్య శాఖ మంత్రి సత్యకుమార్

ఈ సేవలు పూర్తిగా ఉచితం…

అమ‌రావ‌తి: రాష్ట్రంలో కొత్తగా 12 డయాలసిస్ కేంద్రాలు (రక్త శుద్ధి) ఏర్పాటు కాబోతున్నాయి. టెండర్ ద్వారా ఎంపికచేసిన సంస్థ 3 నెలల్లోగా ఈ కేంద్రాల నిర్వహణ బాధ్యతల్ని చేప‌ట్టనుంది. ప్రైమ్ మినిస్టర్ నేషనల్ డయాలసిస్ ప్రోగ్రాం’ (PMNDP) కింద రాష్ట్రంలోని సెకండరీ ఆసుపత్రుల్లో (జిల్లా, ప్రాంతీయ, సామాజిక) 61 కేంద్రాలు నడుస్తున్నాయి. వీటికి అదనంగా ఈ 12 కేంద్రాలు వస్తున్నాయి. అద‌న‌పు కేంద్రాల‌తో క‌లిపి మొత్తం 73 అందుబాటులో ఉంటాయి. కొత్త కేంద్రాల రాకతో దూర ప్రాంతాలకు వెళ్లి రక్త శుద్ధి చేయించుకునే రోగులకు అవస్థలు తగ్గుతాయి. ఈ సేవలు పూర్తిగా ఉచితం. ఈ కేంద్రాల ఏర్పాటుకు కూటమి ప్రభుత్వoఐదేళ్లకు కలిపి సుమారు రూ.30 కోట్ల వరకు ఖర్చు పెడుతుంది.

ప్రైవేట్‌, కార్పొరేట్‌ ఆసుపత్రుల్లో డయాలసిస్ చేయించుకోవాలంటే ఒక్కొక్క సెషన్ కు కనీసం రూ.3,000 నుంచి రూ.4,000 వరకు వ్య‌య‌మ‌వుతుంది. ఒక్కొక్కరికి నెలకు నాలుగైదుసార్లు రక్త శుద్ధి చేయాల్సి ఉంటుంది.

23 నెలల్లో 24 కేంద్రాల ఏర్పాటు:- కూటమి ప్రభుత్వంలో ఇప్పటివరకు 12 కేంద్రాలు కొత్తగా ఏర్పడ్డాయి. వీటికి అదనంగా ఈ 12 కేంద్రాలు రాబోతున్నాయని మంత్రి ప్ర‌క‌ట‌న‌లో వెల్లడించారు.23 నెలల్లో 24 కేంద్రాల ఏర్పాటుకు చర్యలు తీసుకున్నామన్నారు.

12 కేంద్రాలు ఎక్కడెక్కడ:- పశ్చిమ గోదావరి జిల్లా భీమవరం , చిత్తూరు జిల్లా పీలేరు, వైఎస్సార్ కడప జిల్లా జమ్మలమడుగు ఏరియా ఆసుపత్రుల్లో ఈ కేంద్రాలు ఏర్పాటుకాబోతున్నాయి. అలాగే..నెల్లూరు జిల్లా వెంకటగిరి, ప్రకాశం జిల్లా అద్దంకి, నంద్యాల జిల్లా సున్నిపెంట, తిరుపతి జిల్లా రైల్వే కోడూరు, ప్రకాశం జిల్లా కొండేపి, తూర్పుగోదావరి జిల్లా కోవూరు, కడప జిల్లా మైదుకూరు, ఎన్టీఆర్ జిల్లా నందిగామ, పల్నాడు జిల్లా వినుకొండ సామాజిక ఆసుపత్రుల్లో ఈ కేంద్రాలు వస్తున్నాయి. ఒక్కో కేంద్రంలో రక్త శుద్ధి నిర్వహణ కోసం 5 చొప్పున మెషిన్లు సమకూరుస్తారు. ఒక్కొక్క కేంద్రంలో సుమారు రూ.85 లక్షలు విలువచేసే రక్త శుద్ధి యంత్రాలు/పరికరాలను సమకూరుస్తారు. వీటివల్ల 1,500 మంది రోగులకు ప్రయోజనం చేకూరుతుంది..