భవిష్యత్‌ తరాల మనుగడకు ఆడబిడ్డలను కాపాడుకోవడం మనందరి బాధ్యత-కలెక్టర్‌
ఘనంగా అంతర్జాతీయ బాలికా దినోత్సవం..
నెల్లూరు: భవిష్యత్‌ తరాల మనుగడకు ఆడబిడ్డలను కాపాడుకోవడం మనందరి బాధ్యత అని జిల్లా కలెక్టర్‌ హిమాన్షు శుక్ల అన్నారు. ఈనెల 11న జరిగిన అంతర్జాతీయ బాలికా దినోత్సవాన్ని పురస్కరించుకుని జరుగుతున్న వారోత్సవాల్లో భాగంగా మంగళవారం ఉదయం ICDS ఆధ్వర్యంలో నిర్వహించిన ర్యాలీని కలెక్టర్‌ జెండా ఊపి ప్రారంభించారు. నెల్లూరు నగరంలోని డికెడబ్ల్యు కళాశాల నుంచి కెవిఆర్‌ పెట్రోలు బంకు మీదుగా కొనసాగిన ర్యాలీలో అధికారులు, అంగన్‌వాడీ, వైద్యారోగ్యశాఖ సిబ్బందితో కలిసి కలెక్టర్‌ పాల్గొన్నారు.
లింగనిర్థారణ పరీక్షలు చేస్తే కఠిన:- ఈ సందర్భంగా కలెక్టర్‌ హిమాన్షు శుక్ల మాట్లాడుతూ ఒక ఇంట్లో ఆడబిడ్డ చదువుకుంటే ఆ కుటుంబంతో పాటు సమాజం కూడా అభివృద్ధి చెందుతుందన్నారు. ఆడపిల్ల ఇంటి వెలుగు అని, ఆమె అనుకుంటే ఏదైనా సాధించగలదని, కుటుంబం కోసం ఆమె చేసే త్యాగం మరెవ్వరూ చేయలేరని మహిళల ఔన్యత్యాన్ని, ప్రతిభాపాఠవాలను కలెక్టర్‌ కొనియాడారు. ఆడపిల్లల అభ్యున్నతికి కుటుంబం, సమాజం, ప్రభుత్వాలు అత్యధిక ప్రాధాన్యత ఇవ్వాల్సి ఉందన్నారు. నేటి పోటీ పరీక్షల్లో కూడా బాలికలు ముందంజలో ఉన్నారన్న కలెక్టర్‌, బాలికలకు మెరుగైన విద్యను అందిస్తే వారు సమాజానికి విజయాలు అందిస్తారన్నారు. లింగనిర్థారణ పరీక్షలు చేస్తే కఠిన తీసుకుంటామని కలెక్టర్‌ ఈ సందర్బంగా హెచ్చరించారు. జిల్లాలోని ప్రైవేటు వైద్యశాలలు, ల్యాబ్‌లలో లింగనిర్థారణ పరీక్షలు చేసినట్లు తమ దృష్టికి వస్తే వారిపై చట్టప్రకారం చర్యలు తీసుకుంటామని చెప్పారు. భవిష్యత్‌ తరాల కోసం ఆడబిడ్డలను అత్యంత జాగ్రత్తగా కాపాడుకోవడం సమాజంలోని ప్రతిఒక్కరి బాధ్యతగా కలెక్టర్‌ చెప్పారు. జిల్లాలో వారంరోజుల పాటు ప్రజలకు ఆడబిడ్డల గొప్పతనం తెలిసేలా అవగాహనా కార్యక్రమాలు నిర్వహిస్తున్నట్లు కలెక్టర్‌ చెప్పారు. ఈ కార్యక్రమంలో ICDS PD హేనాసుజన్‌, DM&HO Dr.సుజాత, బాలల సంరక్షణ అధికారి సురేష్‌, ఇంటర్‌ మీడియట్‌ ప్రాంతీయ అధికారి వరప్రసాద్‌, ఐసిడిఎస్‌, వైద్యారోగ్యశాఖ సిబ్బంది తదితరులు పాల్గొన్నారు.
