రాష్ట్రంలో కొత్తగా 7 డయాలసిస్ కేంద్రాలు-మంత్రి సత్యకుమార్
అమ‌రావ‌తి: రోగులకు ఉప‌శ‌మ‌నం క‌లిగించేలా రాష్ట్రంలో అదనంగా 7 కొత్త డయాలసిన్ (రక్త శుద్ధి) కేంద్రాలను ఏర్పాటుచేయ‌నున్న‌ట్లు వైద్యారోగ్య శాఖా మంత్రి సత్యకుమార్ యాద‌వ్ వెల్ల‌డించారు. ఈ మేర‌కు మంగ‌ళ‌వారంనాడు జారీ చేసిన ఒక ప్ర‌క‌ట‌నలో తెలిపారు. విజయనగరం జిల్లా ఎస్.కోట, పశ్చిమ గోదావరి జిల్లా భీమవరం, చిత్తూరు జిల్లా పీలేరు ఏరియా ఆసుపత్రుల్లో, పార్వతీపురం మన్యం జిల్లా సీతంపేట, ఎస్పీఎస్ఆర్ జిల్లా వెంకటగిరి, బాపట్ల జిల్లా అద్దంకి, నంద్యాల జిల్లా సున్నిపెంట సీహెచ్‌సీ అనువత్రుల్లో ఈ డయాలసిస్ కేంద్రాలు కొత్తగా రానున్నాయ‌ని చెప్పారు. ప్రతి కేంద్రంలో ప్రతి రోజూ మూడు సెషన్ల ద్వారా 15 మందికి చొప్పున రక్త శుద్ది జరుగుతుంద‌ని తెలిపారు. ప్రధానమంత్రి నేషనల్ డయాలసిన్ ప్రోగ్రాం (పిఎంఎన్డీపీ) కింద ఏర్పాటు కానున్న ఒక్కొక్క కేంద్రంలో సుమారు రూ.75 లక్షలు విలువచేసే 3 రక్త శుద్ధి యంత్రాలు/పరికరాలు సమకూరుతాయ‌ని పేర్కొన్నారు. ప్రస్తుతం రాష్ట్రంలో 232 కేంద్రాలు పనిచేస్తున్నాయి. రానున్న కొత్త‌వాటితో క‌లిపి వీటి సంఖ్య 239కు చేరుకుంటుంది.
ఎన్.కోట, సీతంపేట ఆసుపత్రుల్లోని కేంద్రాలు సిద్ధం:- ఎస్.కోట, సీతంపేట ఆసుపత్రుల్లో కొత్త డయాలసిస్ కేంద్రాలు త్వరలో పనిచేయనున్నాయి. PPP విధానంలో వీటి నిర్వహణ బాధ్యతలను ఓ సంస్థకు అప్పగించారు. మిగిలిన కేంద్రాలను కూడా పీపీపీ విధానంలో నడిపేందుకు టెండర్లు పిలవాలని రాష్ట్ర వైద్య మౌలిక సదుపాయాల అభివృద్ధి సంస (APMNIDC)ను రాష్ట్ర వైద్య ఆరోగ్య శాఖ కోరింది.
డాక్ట‌ర్ ఎన్టీఆర్ వైద్య సేవ ట్రస్టు ద్వారా:- రాష్ట్రంలో ప్రస్తుతం ఉన్న 232లో ఎన్టీఆర్ వైద్యసేవ ట్రస్టు అనుబంధంగా పీపీపీ విధానంలో 173 కేంద్రాలు న‌డుస్తున్నాయి. వీటిల్లో 153 కేంద్రాలు ప్రైవేట్ ఆసుపత్రుల్లో, మిగిలిన‌వి బోధ‌న, ఇత‌ర ఆసుపత్రుల్లో ఉన్నాయి. వీటి ద్వారా 2024-25 ఆర్థిక సంవ‌త్స‌రంలో వేలాది మంది రోగులు 10,62,008 సార్లు డయాలసిస్ చేయించుకున్నారు.
PMNDP ద్వారా:- ప్రధానమంత్రి నేషనల్ డయాలసిన్ ప్రోగ్రాం (పీఎంఎన్డీపీ) ఆధ్వర్యంలో 59 డయాలసిస్ కేంద్రాలు వనిచేస్తున్నాయి. వీటి ద్వారా కూడా అధిక సంఖ్య‌లో రోగులకు 4,95,186 సార్లు డయాలసిస్ జ‌రిగింది. ఈ కేంద్రాలు జిల్లా, ఏరియా ఆసుప‌త్రులు, సీహెచ్‌సీల్లో ఉన్నాయి. వైద్యుల సిఫార‌సు మేర‌కు రోగులకు స‌గ‌టున నెల‌కు 6 నుంచి 8 సార్లు ఉచితంగా ర‌క్త‌శుద్ధి చేస్తున్నారు.
