పోలీస్ స్టేషన్లలో చార్జి షీట్లు సకాలంలో ఫైల్ చేయకుంటే నోటీసులు-జిల్లా జడ్జీ
నగరంలో 7 ట్రాఫిక్ సిగ్నల్ పాయింట్లు…
నెల్లూరు: సమాజం, న్యాయవ్యవస్థతో అనుబంధం కలిగి ప్రభుత్వ శాఖలన్నీ ప్రజా సమస్యల పరిష్కారంలో కీలక భూమిక పోషించాలని జిల్లా ప్రధాన న్యాయమూర్తి జి.శ్రీనివాస్‌ పిలుపునిచ్చారు. శనివారం స్థానిక జిల్లా న్యాయస్థానంలోని న్యాయమూర్తి ఛాంబర్‌లో ప్రభుత్వశాఖల సమన్వయ కమిటీ ఉన్నతస్థాయి సమావేశం జిల్లా ప్రధాన న్యాయమూర్తి అధ్యక్షతన నిర్వహించారు.
ఈ సందర్భంగా జిల్లా ప్రధాన న్యాయమూర్తి జి. శ్రీనివాస్‌ మాట్లాడుతూ హైకోర్టు ఆదేశాల మేరకు ప్రతి మూడునెలలకొకసారి ప్రజాసమస్యలకు పరిష్కారం చూపడమే లక్ష్యంగా ప్రభుత్వశాఖల సమన్వయ కమిటీ ఉన్నత స్థాయి సమావేశం నిర్వహిస్తున్నట్లు చెప్పారు. జిల్లాలో పత్రికల్లో వచ్చిన కొన్ని సంఘటలను హైకోర్టు సుమోటోగా స్వీకరించి చర్యలు ఆదేశించినట్లు ఆయన వివరించారు. అన్ని పోలీస్ స్టేషన్లలో చార్జి షీట్లను సకాలంలో ఫైల్ చేయాలని, లేకుంటే నోటీసులు జారీ చేస్తామని ఆయన చెప్పారు.
చింతారెడ్డిపాలెం జంక్షన్‌ వద్ద ప్లై ఓవర్‌ బ్రిడ్జి నిర్మాణానికి రూ.115.27 కోట్లు మంజూరు చేసిందని, త్వరలోనే టెండర్లు పూర్తిచేసి ప్లై ఓవర్‌ బ్రిడ్జి నిర్మాణ పనులు ప్రారంభించనున్నట్లు అధికారి చెప్పారు. అలాగే ప్రమాదాల నివారణకు హైవేపై బ్లింకర్లు, సోలార్‌ లైట్లు ఏర్పాటు ప్రక్రియ డిసెంబరు 25లోగా పూర్తి చేస్తామని ఆయన చెప్పారు.
నగరంలో 7 సిగ్నల్ పాయింట్లు:- నెల్లూరు కార్పొరేషన్‌ పరిధిలో ట్రాఫిక్ రద్దీని నివారించేందుకు, ప్రమాదాల జరగకుండా 7 ప్రధాన రద్దీ కూడళ్లలో 7 ట్రాఫిక్ సిగల్స్‌ పాయింట్లను ప్రారంభిస్తున్నట్లు కమిషనర్‌ నందన్‌ తెలిపారు. కెవిఆర్‌ పెట్రోలుబంకు, ఎస్పీ కార్యాలయం,హరనాథపురం, కనకమహల్‌, ఆర్టీసీ బస్టాండు మొదలైన రద్దీ ప్రాంతాల్లో ట్రాఫిక్ సిగల్స్‌ ఏర్పాటు ప్రక్రియ పూర్తి అయ్యిందని, త్వరలోనే ప్రారంభిస్తామని కమిషనర్‌ జిల్లా ప్రధాన న్యాయమూర్తికి వివరించారు.
ఈ సమావేశానికి జిల్లా న్యాయసేవాధికార సంస్థ కార్యదర్శి కె. వాణి, తిరుపతి కలెక్టర్ వెంకటేశ్వర్‌, నెల్లూరు, తిరుపతి ఎస్పీలు డాక్టర్‌ అజిత వేజండ్ల, సుబ్బరాయుడు, జాయింట్‌ కలెక్టర్ మొగిలి వెంకటేశ్వర్లు, అడిషనల్‌ ఎస్పీ సౌజన్య, వివిధశాఖల అధికారులు హాజరయ్యారు.
