విమాన ప్రయాణంలో అయ్యప్ప భక్తులు ఇరుముడి తీసుకుని వెళ్లచ్చు-కేంద్ర మంత్రి

అమరావతి: శబరిమల పవిత్ర యాత్రలో పాల్గొనే అయ్యప్ప భక్తుల సౌలభ్యం కోసం, ఇరుముడికి ఉన్న పవిత్రత, భావోద్వేగాల్ని గౌరవిస్తూ, భక్తులు ఇరుముడిని తమతో పాటు నేరుగా విమాన ప్రయాణంలో తీసుకెళ్లేందుకు మా పౌర విమానయాన మంత్రిత్వ శాఖ అనుమతి ఇచ్చిందని కేంద్ర మంత్రి రామ్ మోహన్ నాయుడు తెలిపారు. అవసరమైన అన్ని భద్రతా ప్రమాణాలను కట్టుదిట్టంగా అమలు చేస్తూనే భక్తుల సాంప్రదాయలు, ఆచారాలకు ఎటువంటి భంగం కలగకుండా ఉండేందుకు ఈ నిర్ణయం తీసుకున్నామన్నారు. మన దేశం గర్వించే సాంస్కృతిక విలువలు,  సంప్రదాయాలు మరియు భక్తి స్ఫూర్తిని నిలబెట్టే దిశగా మా నిబద్ధతను ఈ నిర్ణయం ప్రతిబింబిస్తుందని వివరించారు. నవంబరు నుంచి 2026 జనవరి 20వ తేదీ వరకు దేశవ్యాప్తంగా ఈ ప్రత్యేక సడలింపు అమల్లో ఉంటుంది. శబరిమల యాత్రకు వెళ్లే భక్తులు ఎయిర్‌పోర్టు భద్రతా తనిఖీలను పూర్తి చేసిన తర్వాత తమ ఇరుముడిని తీసుకెళ్లొచ్చు.