రోడ్డు ఆక్రమిస్తూ వ్యాపారాలు చేయకుండా పర్యవేక్షించండి-కమిషనర్ నందన్

నెల్లూరు: నగరపాలక సంస్థ పరిధిలోని మద్రాస్ బస్టాండ్ ఎ.సి సుబ్బారెడ్డి కూరగాయల మార్కెట్ ప్రాంగణం పరిసరాలలో రోడ్లను ఆక్రమిస్తూ వ్యాపారాలు నిర్వహిస్తూ, ట్రాఫిక్ అంతరాయాలకు కారణంగా నిలుస్తున్న రోడ్డు మార్జిన్ దుకాణాలను తొలగించి, తిరిగి ఏర్పాటు చేయకుండా ప్రతిరోజు పర్యవేక్షించాలని కమిషనర్ వై.ఓ నందన్ శానిటేషన్ విభాగం అధికారులను ఆదేశించారు.సోమవారం పారిశుధ్య పనుల పర్యవేక్షణలో భాగంగా స్థానిక ఏసి సుబ్బారెడ్డి కూరగాయల మార్కెట్ పరిసర ప్రాంగణాలను కమిషనర్ పరిశీలించారు. ఈ సందర్భంగా కూరగాయల మార్కెట్ రోడ్డు వెంబడి ఆక్రమించి ఏర్పాటు చేసుకున్న దుకాణాలు, రోడ్లకు పక్కగా కూరగాయలు, పండ్ల వ్యర్ధాలు, రోడ్డుపై అపరిశుభ్రంగా ఉన్న పరిసర ప్రాంతాలు, రోడ్లపై సంచరిస్తున్న పశువులను గుర్తించిన కమిషనర్ తక్షణమే చర్యలు తీసుకోవాలని ఎమ్.హెచ్.ఓ ను ఆదేశించారు. పెద్ద సంఖ్యలో వినియోగదారులు విచ్చేసే కూరగాయల మార్కెట్ రోడ్డులో ట్రాఫిక్ అంతరాయం కలగకుండా అన్ని చర్యలు తీసుకోవాలని, మార్కెట్ అసోసియేషన్ నిర్వాహకులను కమిషనర్ సూచించారు. నిబంధనలను అతిక్రమించిన వారిని గుర్తించి జరిమానాలు విధించాలని, రోడ్డు ఆక్రమణలు పునరావృతం కాకుండా నిరంతర పర్యవేక్షించాలని శానిటేషన్ విభాగం అధికారులను కమిషనర్ ఆదేశించారు. ఈ కార్యక్రమంలో నగరపాలక సంస్థ ఆరోగ్య శాఖ అధికారి డాక్టర్ కనకాద్రి, శానిటరీ సూపర్వైజర్ ఆశీర్వాదం, వార్డు సచివాలయ శానిటేషన్ కార్యదర్శి హీన తదితరులు పాల్గొన్నారు.