పారిశుధ్య నిర్వహణకు ప్రజలందరూ సహకరించాలి-కమిషనర్ నందన్

టిడ్కో గృహ నిర్మాణాలను..

నెల్లూరు: నగర పాలక సంస్థ పరిధిలో పారిశుధ్య నిర్వహణ పనులకు నగర ప్రజలంతా సహకరించి వ్యర్ధాలను వీధుల్లో వేయకుండా, నిర్దేశించిన డస్ట్ బిన్లలో మాత్రమే వేసి స్వచ్ఛ నెల్లూరు సాకారానికి సహకరించాలని కమిషనర్ నందన్ విజ్ఞప్తి చేశారు. ప్రజా సమస్యల పరిష్కార వేదికను కార్యాలయంలోని కమాండ్ కంట్రోల్ సెంటర్ విభాగంలో సోమవారం నిర్వహించారు. ఈ సందర్భంగా కమిషనర్ మాట్లాడుతూ మున్సిపల్ కార్మికుల సమ్మె నేపథ్యంలో ప్రజలందరూ గృహ వ్యర్ధాలను బహిరంగ ప్రదేశాలలో వేయకుండా, వీధుల్లో ఏర్పాటు చేసిన డస్ట్ బిన్స్ లో మాత్రమే వేయాలని సూచించారు.

టిడ్కో గృహ నిర్మాణాలను త్వరితగతిన పూర్తిచేసి లబ్ధిదారులకు అందజేయనున్నామని తెలిపారు. వివిధ కారణాలవల్ల లబ్ధిదారులకు కొన్ని గృహాలు మంజూరు కాలేదని, వాటికోసం గతంలో చెల్లించిన మొత్తాలను తిరిగి లబ్ధిదారులకు అందిస్తామని కమిషనర్ వెల్లడించారు. గతంలో కొంత మంది కర్టైమెంట్ కు వెళ్లిన వారు తిరిగి ఇల్లు కావలని కోరుతున్నారని తెలిపారు..

నెల్లూరు నగర పాలక సంస్థ పరిధిలోని స్థానిక సమస్యలను కమాండ్ కంట్రోల్ విభాగంలో ఏర్పాటు చేసిన హెల్ప్ లైన్ కి ఫోన్ ద్వారా తెలియజేస్తే తక్షణమే స్పందించి ఫిర్యాదును పరిష్కరించేందుకు కృషి చేస్తామని తెలిపారు. ఫిర్యాదుదారులు తమ సమస్యలను 94940 18118 నెంబరుకు వాట్సప్ ద్వారా లేదా 1800 425 1113 టోల్ ఫ్రీ నెంబరుకు ఉదయం 6:00 గంటల నుంచి సాయంత్రం 6:00 గంటల లోపు తెలియజేయాలని కోరారు.

విభాగాల వారీగా అకౌంట్ సెక్షన్ 2, ఆప్కాస్ 2, ఇంజనీరింగ్ 9, టిడ్కో హౌసింగ్ 15, రెవెన్యూ 2, టౌన్ ప్లానింగ్ 5, పబ్లిక్ హెల్త్ 4, హెచ్ సెక్షన్ – 3, పెన్షన్ – 1, మొత్తం 43 అర్జీలను కమిషనర్ ప్రజా సమస్యల పరిష్కార వేదికలో అందుకున్నారు. నిర్దేశించిన సమయంలోపు సమస్యలన్నిటిని పరిష్కరించాలని విభాగాల ఉన్నతాధికారులను ఆదేశించారు. ఈ కార్యక్రమంలో నెల్లూరు నగరపాలక సంస్థ డిప్యూటీ కమిషనర్ చెన్నుడు, ఇంజనీరింగ్ విభాగం ఎస్.ఈ రామ్ మోహన్ రావు, ఆరోగ్య శాఖాధికారి డాక్టర్ కనకాద్రి, సెక్రటరీ శ్రీలక్ష్మి, సిటీ ప్లానర్ హిమబిందు, మేనేజర్ రాజేశ్వరి, అన్ని విభాగాల అధికారులు, సిబ్బంది పాల్గొన్నారు.