వినికిడి లోపానికి వైద్య సేవలు-63 ప్రభుత్వాసుపత్రుల్లో ‘బెరా’ పరికరాలు- మంత్రి సత్యకుమార్

సదరం సర్టిఫికెట్ల జారీ మరింత సులువు..

అమరావతి: వినికిడి లోపం కలిగిన వారికి వైద్య సేవల్ని మరింత చేరువ చేసేందుకు రాష్ట్రంలోని 63 ప్ర‌భుత్వాసుప‌త్రుల్లో కొత్తగా ‘బెరా’ (Brainstem Evoked Response Audiometry) పరికరాలను రూ.15.11 కోట్ల వ్యయంతో సమకూర్చనున్నట్లు రాష్ట్ర వైద్యారోగ్య‌ శాఖ మంత్రి సత్యకుమార్ వెల్లడించారు. ప్రస్తుతం బోధనాసుపత్రుల్లో మాత్రమే అందుబాటులో ఉన్న ఈ పరికరాలను తొలిసారిగా 9 జిల్లా ఆసుపత్రులు, 54 ప్రాంతీయ ఆసుపత్రుల్లోనూ అందుబాటులోనికి తీసుకురావాలని సీఎం చంద్రబాబు నాయుడు నిర్ణయించారని మంత్రి సత్యకుమార్ పేర్కొన్నారు. బెరా పరికరాల ద్వారా వినికిడి లోపం ఉన్న‌ బాధితుల‌కు సూక్ష్మ స్థాయిలో ఎంత మేరకు ఉందో వైద్యులు గుర్తించేందుకు సులువవుతుందని తెలిపారు. దీనికి అనుగుణంగా వైద్యులు అందించే చికిత్సవల్ల రోగులకు వినికిడి లోపం మరింత పెరగకుండా ఉంటుందని గురువారంనాడొక‌ ప్రకటనలో మంత్రి సత్యకుమార్ తెలిపారు. 63 అసుపత్రుల్లో 2 నుంచి 3 నెలల్లోగా అందుబాటులోనికి రానున్న ఒక్కొక్క బెరా పరికరం, ఇతర సౌకర్యాల క‌ల్ప‌న‌కు రూ.26 లక్షల నుంచి గ‌రిష్టంగా రూ.32 ల‌క్ష‌ల వ‌ర‌కు ప్రభుత్వం ఖర్చు పెడుతుందని పేర్కొన్నారు.

దివ్యాంగులకు తగ్గనున్న వ్యయప్రయాసలు:- బెరా పరికరం సాయంతో ‘సదరం’ దరఖాస్తుదారులకు వినికిడి లోపం శాతాన్ని వైద్యులు క‌చ్చితంగా గుర్తించి సర్టిఫికెట్ల జారీకి సిఫార‌సు చేస్తారు. ప్రస్తుతం దిగువ స్థాయి ఆసుపత్రుల్లో బెరా పరికరాలు లేనందున వినికిడి లోపం కలిగిన వారు ‘సదరం’ కింద నిర్ధారణ పరీక్షల కోసం బోధనాసుపత్రులకు వెళ్లేందుకు అవస్థలు పడుతున్నారు. రోగులకు చికిత్స అందించడంలో ఇటువంటి పరిస్థితులు నెలకొన్నాయి. వైద్యులు వినికిడి లోపాన్ని క‌చ్చితంగా నిర్ధారించలేక రోగులను ఇతరచోట్లకు పంపుతున్నారు. ఈ పరిస్థితుల్లో కూటమి ప్రభుత్వం ‘బెరా’ పరికరాలను 63 ప్ర‌భుత్వాసుప‌త్రుల్లో  సమకూర్చాలని నిర్ణయించడంవల్ల రోగులకు అవస్థలు వైదొలగనున్నాయి.

జిల్లా ఆసుపత్రుల్లో:- హిందూపురం జిల్లా ఆసుపత్రి, తణుకు, టెక్కలి, ఆత్మకూరు (నెల్లూరు జిల్లా), తెనాలి, పార్వతీపురం, ప్రొద్దుటూరు, చిత్తూరు, అనకాపల్లి జిల్లా ఆసుపత్రుల్లో బెరా సౌకర్యం కుప్పం, ధర్మవరం ఏరియా ఆసుపత్రులతోపాటు ఇతరచోట్ల అందుబాటులోనికి రాబోతున్నాయి.