విశాఖ AI హబ్ ఏర్పాటుకు ఢిల్లీలో గూగుల్ చరిత్రాత్మక ఒప్పందం-థామస్ కురియన్
$15 బిలియన్ డాలర్ల పెట్టుబడులు..
అమరావతి: భారత ప్రభుత్వ సహకారం, ఆంధ్రప్రదేశ్ రాష్ట్ర మద్దతుతో విశాఖపట్నంలో నూతనంగా 1 గిగావాట్ సామర్థ్యం గల AI హబ్‌ను ఏర్పాటుచేయబోతున్నామని వెల్లడించేందుకు మాకు ఆనందంగా ఉందని,, ఇది అమెరికా తర్వాత ప్రపంచంలో గూగుల్ నిర్మించబోయే అతి పెద్ద AI హబ్ అని గూగుల్ క్లౌడ్ గ్లోబల్ సీఈవో థామస్ కురియన్ ప్రకటించారు.మంగళవారం ఢిల్లీలోని తాజ్ మాన్ సింగ్ హోటల్ లో జరిగిన కార్యక్రమంలో గూగుల్ AI హబ్ ఏర్పాటుపై ఆంధ్రప్రదేశ్ ప్రభుత్వం, గూగుల్ ప్రతినిధుల నడుమ చరిత్రాత్మక అవగాహన ఒప్పందం జరిగింది. ఈ కార్యక్రమంలో రాష్ట్ర ముఖ్యమంత్రి చంద్రబాబునాయుడు, రాష్ట్ర ఐటీ, ఎలక్ట్రానిక్స్ శాఖల మంత్రి నారా లోకేష్, కేంద్ర ఆర్థిక మంత్రి నిర్మలా సీతారామన్, కేంద్ర సమాచార, ప్రసార శాఖల మంత్రి అశ్వనీ వైష్టవ్, గూగుల్ క్లౌడ్ గ్లోబల్ సీఈవో థామస్ కురియన్, బికాష్ కొలే (వైస్ ప్రెసిడెంట్, గ్లోబల్ ఇన్‌ఫ్రాస్ట్రక్చర్), కరణ్ బజ్వా (ప్రెసిడెంట్, ఏషియా పసిఫిక్ గూగుల్ క్లౌడ్) తదితరులు పాల్గొన్నారు.
విశాఖలో రూ.1,33,000 కోట్లు పెట్టుబడి:- ఈ సందర్భంగా సీఈవో థామస్ కురియన్ మాట్లాడుతూ… విశాఖలో 1 గిగావాట్ సామర్థ్యంతో తాము ప్రారంభించే ఏఐ హబ్ ను… భవిష్యత్తులో మరిన్ని గిగావాట్లకు విస్తరిస్తాం. వచ్చే 5 సంవత్సరాల్లో విశాఖ ఏఐ హబ్ నిర్మాణానికి $15 బిలియన్ అమెరికన్ డాలర్లు (రూ.1,33,000 కోట్లు) పెట్టుబడి పెట్టబోతున్నామని,,ఇది ప్రపంచవ్యాప్తంగా 12 దేశాలలో ఉన్న ఏఐ సెంటర్స్ నెట్‌వర్క్‌ లో భాగంగా ఉంటుందన్నారు. భారతదేశంలో మేం నిర్మించే అతి పెద్ద AI కేంద్రం ఇదే. దీనిద్వారా విశాఖపట్నాన్ని ప్రపంచ స్థాయి కనెక్టివిటీ హబ్‌గా అభివృద్ధి చేయబోతున్నాం అని తెలిపారు. ఇందుకోసం విశాఖపట్నంలో సముద్రగర్భ కేబుల్ వ్యవస్థను ఏర్పాటు చేసి, ఈ సబ్‌ సీ కేబుల్ నెట్‌వర్క్‌ ను అంతర్జాతీయ నెట్‌వర్క్‌ కు కనెక్ట్ చేసి, దేశంలోని వివిధ ప్రాంతాల్లోని డిజిటల్ ఆధారిత వ్యవస్థలతో అనుసంధానిస్తామని వెల్లడించారు.
