కోనసీమ జిల్లాల్లో తుఫాన్ బాధితులను పరామర్శించిన సీ.ఎం చంద్రబాబు

అమరావతి: డాక్టర్ బీఆర్ అంబేద్కర్ కోనసీమ జిల్లా, అల్లవరం మండలం, ఓడలరేవులో బుధవారం ముఖ్యమంత్రి చంద్రబాబు నాయుడు  తుఫాన్ బాధితులను పరామర్శించారు. పునరావాస కేంద్రాల్లోని నిర్వాసిత కుటుంబాలకు నిత్యావసర సరుకులు, 25 కేజీల బియ్యం, ఒక్కో కుటుంబానికి రూ.3 వేల చొప్పున సాయం అందించారు. అనంతరం అరగట్లపాలెం, బెండమూరు లంక గ్రామాల్లో నీట మునిగిన పంట పొలాలను సీఎం చంద్రబాబు పరిశీలించి రైతులతో మాట్లాడారు. ప్రభుత్వం ఆదుకుంటుందని భరోసా ఇచ్చారు.

ఆస్తి నష్టంపై కేంద్ర ప్రభుత్వానికి నివేదిక:- ఈ సందర్బంలో సీ.ఎం మాట్లాడుతూ తుఫానుపై ముందు జాగ్రత్తలు తీసుకుని ప్రాణ నష్టం జరుగకుండా చర్యలు చేపట్టామని పేర్కొన్నారు. తుఫాన్ బాధితులకు నిత్యావసరాలు, రూ.3 వేలు పరిహారం అందచేస్తున్నమన్నారు. మత్స్యకారుల కుటుంబాలకు 50 కిలోల బియ్యం అందిస్తున్నమన్నారు.కోనసీమ జిల్లాతో పాటు పలు జిల్లాల్లో వరి, ఆక్వా, ఉద్యాన పంటలు దెబ్బతిన్నాయని అలాగే నెల్లూరు, ప్రకాశం, బాపట్ల జిల్లాల్లో భారీ వర్షం నమోదైందని వెల్లడించారు.ఆస్తి నష్టంపై కేంద్ర ప్రభుత్వానికి నివేదిక ఇస్తామని తెలిపారు.కౌలు రైతులకు పరిహారం అందిస్తామని భరోసా కల్పించారు.